مهنازمي – سونامي!!!

سه‌شنبه ٣۰ بهمن ۱٣٨۶ - ۱۹ فوريه ۲۰۰٨


چينيمده عكس ماشيني ، اليمده بير چانتا يولا دوشورم . مقصديم بير ابتدايي مدرسه ( دبستان ) دير. مدرسه نين مودورو خانيم ك... لا تلفونلاشيب مدرسه دن بير گزارش آلما ايذني ني آلميشام.

يولدا اوز –اوزومله دوشونورم:" اوشاقلارلا نئجه دانيشاجاغام . اوز سورولاريمي نئجه اونلارا دوشوندوره جه يه م.

مدرسه نين اونونه يتيشيرم :

جمهوري اسلامي ايران
وزارت آموزش و پرورش

اداره كل آموزش و پرورش آ. شرقي

ناحيه....

دبستان دولتي دخترانه ...

چورك دوزدورمو يوخسا نان ؟ برادر يا قارداش؟

مدرسه نين ايچينه گيريرم . بيرقوجا قادين منه ساري گليب : "نه ايشينيز وار؟" دئيه منه باخير. "باغيشلاين خانم ك... لا قرارلاشميشام" . بويورون دئيه مني مدرسه نين مودورو اوتاغينا آپارير .

خانيم ك... ميزين آرخاسيندان منه باخيب بويورون دئيير.

اوزومو تانيتديريرام

خانيم ك... مدرسه نين مودورو دور. اوندان علاوه بيرينجي صينيف لرين بير كيلاسينا ناهاردان سونرا معليمچيليك ائدير.

اونونلا چئشيدلي مسئله لره گوره دانيشيرام و اودا مدرسه و اوزونون آديني آپارماماغيم شرطي ايله منيمله دانيشيغا راضيليقين بيلديرير . چوخ سوزدن سونرا 21 فئورال دونيا ناديلي گونوندن سوز آچيرام .

بو مسئله دن اصلا خبري اولماماغيني دئيب آرتيرير:يقين بو گونو بو ايل دن بيزيم اولكه ده قرارا آليبب لارنيب يوخسا بيز هيچ اناديليميزه گوره ده بير ايش گورمه ريك .

اوندان : " بيرينجي صينيفده آنا ديلين تدريس اولماسي ياخشي اولارمي ؟ سوروسونو سوروشورام :

:" معليم لر بيرينجي صينيفده اوشاقلارا درس وئرمكده چوخ چتينليك لر له اوز-اوزه گليرلر. مفهوملاري و اليفباني اوشاقلارا اويرتمك چوخ چتين اولور. اوشاقلار بير پارادوكس آراسيندا قاليرلار . بيرينجي گونلرده اونلار چوخلو سوال لار اوز-اوزه گليرلر . چورك دوزدورمو يوخسا نان ؟ برادر يا قارداش؟ و بو سورو لار نئچه ايل اوشاغين ذهنينده قالير . بونسوز كي بونلارا بير جاواب تاپا بيلسين .

اينديكي وضعيتده آذربايجان اوشاقلاري درسليك لري دوشونمه دن يالنيز حيفظ ائديرلر. بودا ايللر سيراسيندا اونلارين ساوادسيزليغينا سبب اولور.



خانيم ك... علاوه ائدير: بيلميرم توركجه يازيب اويرتمك اولاربيلرمي يا يوخ. آنجاق اگر بئله بير ايش اولا بيلرسه ، معليم لرين ايشي چوخ راحات اولور. اوندان علاوه اينديكي وضعيتده اوشاقلار درسليك لري دوشونمه دن يالنيز حيفظ ائديرلر. بودا ايللر سيراسيندا اونلارين ساوادسيزليغينا سبب اولور.

سوروشورام: سوزلرينيزده اوشاقلارا راست گلن پارادوكس لاردان سوز آچدينيز . اوشاقلار بونلاردان سيزه سوز آچيبلارمي؟

:نيه! بير گون بير كيلاسدا اوشاقلاردان بيري مندن سورشدو: خانيم معليم منيم انام دئيير تهرانداكي لار فارسديلار . ولي اونلار دابيزيم كيمي و تلويزيون كيمي دانيشيرلار ؟ اونا جاواب دئيه بيلمه ديم اوشاق ائله الينه اولموشدوركي بئله بيليردي كي فارسلارين ديلي باشقا بيرديل دير و تلويزيونداكي ديل فارس ديلي يوخ بيزيم ديل دير.

خانيم ك.. سوزلرينين آرديندا مدرسه لرده اوزليكله بيرينجي صينيفده اناديليميزين تدريسيني اونملي بيليب بونون آذربايجان اوشاقلارينين گله جك ايللرينه و اونلارين ياخشي درس اوخوماغينا دوزگون بير تمل بيلدي.

خانيم ك... دن ايذن آليب بير كيلاسا گئديرم. بوكيلاسين معليمي گلمه يب دير.

كيچيك قيز اوشاقلاري مني گوروب بير آز هويوخورلار. آنجاق مدرسه مودورون منيم يانيمدا گوردوكده آياغا دوروب بيركه سلام وئريرلر:

سلام... صبح به خير... خانم مدير.. به كلاس ما... خوش آمديد...

خانيم مودور مني اوشاقلارا تانيتديرب و اونلاردان منيم سوال لاريما جاواب وئرمه لريني ايسته يير.

مودور دن ايزن اليب "تخته ده" آنا ديلي شيرين ديل يازيب اوشاقلارا: هركيمسه بونو اوخويابيلر، آليني قاوزاسين دئيه باخيرام .

اوچ نفر ال قاوزايير.

بيريسيني تخته قاباغينا چاغيريب تخته ده يازيلاني اوخوماسيني ايسته ييرم .

اوخويور :

آنا ديليم شيرين دير.

كيلاسا باخيب دئييرم :هامينيز اوخويون!

هامي اوخويور ...

...آنا ديلي شيرين ديل...

قهه ر بوغازيمي بيچير. دانيشا بيلميرم دينه بيلميرم .كيچيك قيزلارين اينجه سسلري بئينيمده دولانير دلي اولورام .

ياز گلسه " هشت ساله "اولاجاغام

تخته نين اونونده كي قيزا باخيب آدينين" سونا" اولماسيني دوشونوب آديني سوروشورام .

: منيم آديم مهنازدير( اوز اوزومله دئييرم . سن سونا سان . مهناز يوخ)

-نئچه ياشين وار مهناز؟

: ياز گلسه " هشت ساله "اولاجاغام.

- مهناز سككيز ياشين اولاجاق يوخسا هشت ياشين ؟

اوزومه گولوب اوتانجاقجا دئيير: سككيز ياشيم!

گولورم .

سونا( مهناز) گئدير يئرينده اوتورسون . اوشاقلاردان ايسته ييرم :هر كيمسه توركو شعر باجارير گلسين اوخوسون :

ايكي نفر ال قاوزايير . اوزلرينه باخيرام . بير بيرينه اوخشاييرلار. اكيزتايي اولمالاريني بيليب ايكيسيندن : تخته قاباغينا گليب شعيرلريني اوخماغي "ايسته ييرم.

تخته اونونه گلديكده آدلاريني سورورام (اوز-اوزومله بيرينين آديني شيدا و اوبيريسي ليدا اولماسيني دوشونورم )

سليس آذربايجان توركجه سينده دئييرلر:

منيم آديم لاله دير . داغلاردا آچان بيرگول!

منيم آديم لاچين دير . گويلر ده اوچان بيرقوش!

لاله! لاچين! اوخويون شعرينيزي:

اوخويورلار :

آذربايجان منيم ائليم

آذربايجان منيم ديليم

دوغرانسادا ديليم ديليم

منيم ديليم اولن دئيل

باشقا ديله دونن دئيل

اوشاقلار ال چاليرلار ...خانيم مودور گولور .. من هويوخموشام ...



اورييم اودلانير. گچي اليمه گوتورورم . تخته ده يازيرام : منيم كيچيك باجي لاريم بيز نيه اوز آنا ديليميزي يازيب اوخويا بيلميريك؟

اوشاقلار منيم يازديقلاريمي اوخوماغا چتبنليك چكيرلر. كيلاسين بير گوشه سينده كيچيك گوده لي و قارا گوزلي بير قئز هئيرانجا منه باخير . او يقين سونا دير. او سورغومون جاوابيني بيلير. يقين بيلير.

كيلاسدان چيخيرام . مودوردن تشكور ائديب ، آيريليرام .

هله مدرسه دن چيخماميشام . بوغولورام... ايختيارسيز گوز ياشلاريم آخير... بوغازيم بيچيلير ....نيه سونالاريميز مهناز اولماقدادير؟...

سون
قایناق: زومرود