هادي دلي لر، هادي...!!!- اولوس

سه‌شنبه ٣۰ بهمن ۱٣٨۶ - ۱۹ فوريه ۲۰۰٨
شهيد زهتابي ديل صينيف لرينده ايکي مفهومو دائيما تکرار ائدردي. سانکي او بو دوشونجه لري تکرار ائتمکله اونلاري قولاق سيرغاميزا چئويرمک نييئتينده يدي. بيري ني آغير بير تاسسوفله ديگريني ايچه رينده ن گلن بير سئوينجله...


او دئيردي "بوتون ميللتلر اوز ديللريني اوووجلاريندا گؤز ببه يي کيمي ساخلاييرلار، بيزيم ميللتي ايسه ديليميز قورويوب ساخلاماقدادير..." کلمه لر آغزيندان چيخارکن سيماسيندا گورونن تاسسوف حيسسي ني دويماماق اولمازدي. سانکي عومرونون هر بير دقيقه سيني هر بير آنيني خاطيرلاياراق ميللتيميزين باشينا گلنلري تکرارن آنلاماغا چاليشيردي. بعضن گوزلرينده گورونن او داملالار اوزلويونده بيزي دوشوندوره ردي...

او دئيردي "ديلين عومومو بير فلسفه سي وار و او گئنيش معنالي آنلاييشلاري کيچيک جومله و کلمه لرله ايفاده ائتمک دير. بو اوزلويونده ديلين عومرونو گوسترير. نه قده ر ايفاده لر کيچيک اولسا و آنلاييشلار گئنيش ديلين اوزون زامان سيناغيندا آرينماسيني ايثبات ائتميش اولور. بير چوخ حاللاردا ديليميزده اولان کيچيجيک بير ساده جومله و ايفاده ني فارسجايا چئويره نده مورکب جومله لر آلينير." بو جومله لري دئيرکن گوزلرينده کي سئوينجي گيزلتمه يه بئله جسارت ائتمزدي. اصلينده اوشاق کيمي اولماق، داهي لرين ان بويوک باجاريغي ساييلمالي دير سانکي...

يئنه ايل دونوب "آنا ديليميزين" گونو گلدي. زهتابي دوحاسي نين روحو اونون اوميد بسله دي يي گنجلرين باشلاري اوستونده دير. دائيما اونلارلادير. اونلارلا گولور اونلارلا آغلايير... ساغليغيندا گوره بيلمه دي يي ديله قارشي حورمتي، عيززتي آرتيق اونون روحودا دويموشدور. آنا ديلي اوغروندا ان قيمتلي ساييلان جانلار بئله قوربان گئديلير...

و ديل گونو - گونده ن گوجلنن ميللي حرکاتيميزين اساس عنصورو حساب ائديلير. تاريخ سيناغيندان باشي اوجا چيخان ديليميز آرتيق توپراغيميزين، ميللتيميزين گله جه يينين جارچي سينا چئوريليب. و آدديم – آدديم متانتله ايره لي له يير...

ايره لي لديکجه روحوموزا، وارليغيميزا يئني نفسلر بخش ائدير. ديل بيزيم روحوموزدور، ديل بيزيم وارليغيميزدير. روحوموزو، وارليغيميزي يئني ده ن تاپديقدان سونرا کيم اليميزده ن آلا بيلرکي؟!...

زهتابي دئميشکن "ديليميزين آچيلماز بير قالاسي دا وار و او فعللر دياري دير..." ديلين هر بير بوجاغيني يادلاشديرماغا چاليشانلار فعللريميز قارشيسيندا تام معناسيلا عاجيز قالميشلار. اونلار هر نه ائتسه لرده بو قاپي يا ياخين بئله دوشه بيلمه ميشلر. دوشه بيلمزلرده...

تاريخ قريبه اوخشارليقلاري اوزو ايله داشيماقدادير. ديليميزده اولدوغو کيمي ميللتيميزين "فعللرينده ن" ده دوشمان قورخودادير... چوخ دوشونور، آراشديرير، واقت صرف ائدير، اتک- اتک پوللار خرجله يير، فعللري ده ييشمک ايسته يير. آنجاق فعللره ياخين دوشه بيلمير، هانسي زاماندا هانسي فعل باش وئره جه يينده ن باش آچانمير...

فعل يعني حرکت، فعل يعني آدديم، دائيما حرکت ده اولان، حرکتله يوکسلير، يوکسلديکجه گوجلنير، گوجلنديکجه مغلوب ائديلمز اولور...!

يئتکين لشميش ميللي حرکاتيميز، ياتميش بير وولکان کيمي پوسکورمک حاقدا آرتيق دوشونور. دوشوندوکجه داها دا گوجلنير، گوجلنديکجه چيبين لره (ميلچک) ايستهزا ايله گولور...

يئنه ايل دونور، سانکي آنا ديلي گونو يئني بير ايلين باشلانغيجيدير. ائله بير باشلانغيج کي بيزه روح دوشمانا قورخو بخش ائدير...

بيزده اوز ديليميزي "گوز ببه يي کيمي اووجلاريميزدا ساخلاماغي باجاريريق..." او بيزي ساخلادي بيزده اونو ساخلاياجاغيق. ديليميزين تاريخي بويوک اولسا ميللتيميزين تاريخي داهادا بويوک دور. ديليميزي يارادان ميللتيميزدير...

بيز تورکوز!... بيز بيزيک...! ديليميزده ن روحلانان، ديليميزده ن قاينايان بير وولکان...

هادي دلي لر...! هادي...
قایناق: اؤیرنجی