سیاسی یادداشت: اسفند آی نین ایکی سی، آنا دیلی گونو و اویرنجی حرکاتی نین آغیر گوره وی

منبع: اویرنجی

ایندیکی عصیرده دونیا میللتلری هر شئیده ن آرتیق بشر حاقلاری اوزه رینده دوروب و بو حاقلارین الده ائدیب، اثباتلاماثینا چالیشیرلار. میللتلر آرتیق دوشونوبلر کی بشر اوز ایلکین حاقلارینا یئتیشمه سه دونیادا یاشامین آرتیق بیر آنلامی اولمایاجاقدیر. آذربایجان میللی حرکتی ده دونیا ایله برابر بونو دوشونوب و او اساسدا قاباغا گئتمک ایسته ییر. اینسانین ایلکین حاقلاریندان بیریسی آنا دیلی دیر.

بو مساله او قدر میللتلر ایچینده اونم تاپیب کی ایلین بیر گونو بو آدلا آدلانیب. تقویم ده اولان بعضی گونلر آذربایجان میللی حرکتینده بویوک اونمه صاحیبدیر. یقین اسفند آی نین ایکی سی دونیا اوزه ره آنادیلی گونو اولاراق تانیملانان بو گون اونلارین چوخ اهمیتلی لرینده ن بیر یسی دیر. ایکی ایلده ن آرتیق دیر کی آذربایجان میللی حرکتی و اونون اون جبهه سینده یئر آلان اویرنجی حرکاتی یئنی بیر سیاسی یاخلاشیم و تاکتیک له اوز ایستک لرینی اورتایا قویموشدور. بو سون ایکی ایلین ایچینده میللی حرکت و اوزللیکده اویرنجی حرکاتی ایکی قیرمیزی چیزگی ایچه ریسینده دورماغی باشارمیش و اونو هرکسه اعلان ائتمیشدیر. بو ایکی چیزگی نین بیریسی "آذربایجان میلتی نین اوز مقدراتینی بلیرله مه حاققی" و ایکینجی سی ایسه " تورک دیلی نین ایراندا رسمی دیل اولماسی" اولموشدور. اویرنجی حرکاتی چوخ جیددی شکلیده بو ایکی ایسته یین آرخاسیندا دورماغی باشارمیشدیر. 19 اردیبهشت اویرنجی گونو قوتلامالاری ایله بیرلیکده هر ایل اویرنجی لر آنادیلی گونون ده قوتلامیشلار. تبریز، تهران، زنجان، اورمو و دیگر شهرلرده اونیورسیته لرین تورک اویرنجی لری بو شهرلرده آغیر باسقی لارا باخمایاراق آچیق بیر شکیلده اللرینده پلاکارد آلاراق "تورک دیلی رسمی اولسون" شعارینی وئرمیشلر.

هر کسه بللی اولدوغو کیمی آذربایجان میللی حرکتی مدرن و مدنی بیر حرکت دیر. بوگونکو دونیانین شرطلری اساسیندا حرکت ائده ن میللی حرکتیمیز بئله بیر توتوم ایچینده اوزونو "دیل تبعیضی" ینه قارشی اولان بیر حرکت کیمی ده تانیملامایا باشلامیشدیر. دوزدور هله ده تام اولاراق میللی حرکتین بو یاخلاشیمی دونیا مئدیاسینا گرکلی قده ر نفوذ ائده بیلمه میش آما معین باشاریلاردا الده ائتمیشدیر. اسفند آی نین ایکی سی ائله بیر گوندورکی بو گونده آذربایجان میللتی اوز مظلوملوغون دونیایا گوستره بیله ر. بو گونو اولدوقجا دیرلندیرمک هر بیر میللی فعالین بورجودور. هئچ ده اونوتمایالیم کی زنجان شهرینده ن توتولان یولداشلاریمیزین بئله بیر توتومو دونیایا سس سالمیش دیر. آنا دیلی گونو موناسبتیله زنجان دا قهرمانجاسینا گوستری دوزنله ین سعید متین پور و اونون دوستلاری، ائله جه ده قاپانمایا محکوم اولان "جمعیت اسلامی دانشجویان زنجان" تشکیلاتی نین امکداشلاری میللی حرکتیمیز بوینوندا دانیلماز روللاری اولموشدور. بو چیزیلن یول چوخ جیددی شکیلده دوام ائتمه لی دیر. یا بیز توپلاناراق سس سالیب باغیرتی لاریمیزی دونیایا چاتدیراجاغیق و یا سسیز اوتوروب دیلیمیزین محو اولما تراژدیسی فیلیمینی سئیر ائده جه ییک. طبیعی اولاراق هر بیر گوستری نین هزینه سی وار. بو گون اویرنجی حرکاتی باشدا اولماق اوزه ره میللی فعاللاریمیز بئله بیر هزینه وئرمه ده ن چکینمه مه لی دیرلر. آنادیلی گونونده توتولماق آرتیق بیزه و میللی فعاللاریمیز بیر فخردیر. بیزی آنادیلیمیزی ایسته مک اتهامینا توتا بیله رلر، آما لونوتمایالیم کی بو توتولمالار اولمازسا میللی حرکتیمیز باشاری الده ائتمه ییب و آنا دیلیمیز آزاد اولمایاجاق. آنا دیلی گونونده توپلانیب گوستری دوزنله مک تماما بیر وطنداشین مدنی حقی دیر. بو حقی هئچ بیر سیاسی اوتوریته اینسانلاریمیزدان آلابیلمز. بورادا طبیعی کی خشونت و شددتده ن سوز ائدیلمیر. بیز چوخ سیویل و انسانی پرنسیب لر اساسیندا آنا دیلیمیزی ایسته ییریک و بوندان هئچ زامان واز کئچه بیلمه ریک. آرتیق بیزه آنادیلی شرف و حیثیت مسئله سینه چئوریلمیشدیر. بیز اونیورسیته لرده و مئیدانلاردا مدنی و ساکیتجه سینه توپلاناراق ایرانین آپارتایدی سیستمین افشا ائتمه لی یک.

بو دوغرولتودا بوتون اویرنجی قروپلارین سلیقه لرده ن آسیلی اولمایاراق سفربر اولماسی گره کیر. بوگونه قده ر چئشیدلی گوستری لرده تجربه قازانان آیدین گنجلیگیمیز آرتیق صحنه یه گلمه لی دیر.



گوستری لرله ایگیلی اونملی فاکتورلار

1- سایی اونملی دئییل. اونملی اولان بئله بیر گونو عزیزله مک و آپارتایدین قارشیسیندا دیرنمک دیر. اونا گوره اللریمیزده بویوک پلاکاردلارلا "تورک دیلی رسمی اولسون" و "آنا دیلینده مدرسه اولمالی دیر هر کسه" اونجه ده ن بللی اولموش یئرلرده توپلانمالییق.

2- توپلاناجاغیمیز یئرلر هر بیر اونیورسیته و بیلیم یوردونون فعال اویرنجی لری طرفینده ن دمکراتیک بیر آنلاشما اساسیندا بلیرله نه جک دیر.

3- ایندی بو گون تبلیغات گونودور. بیزیم گوستری لریمیزین باشاریلی اولوب اولماماسی گئنیش تبلیغاتدان آسیلی دیر. ائله اونا گوره گوستری لرین شکیللری و فیلیم لری تئز حاضیرلانیب و خبرلری دونیایا چاتدیرمالی ییق. بو مسئله ایله ایلگیلی اونجه ده ن تدبیرلی اولمامیز لازیمدیر.

4- بیز باشقا شعار وئرمه یه جه ییک و خشونت له ایشمیز اولمایاجاق. حرکتیمیزی بو چرچیوه ده ن چیخارماغا چالیشانلارین قارشیسیندا دورمالی ییق.

5- آنا دیلینه گوره جوزوه چیخاتما و اونلاری یایما بوگونکو اورتامدا ده یرلی ایش اولا بیلر.

6- بیز آنا دیلیمیز ایسته ییریک. بو آنا دیلی بوتون آذربایجان تورکلرینین آنا دیلی دیر. اونا گوره بیز نه حراست مامورلاری و نه ده پلیس ده ن چکینه جه ییک. مادام بیز مدنی بیر شکیلده توپلانیریق کیمسه ده ن ده قاچمامالی و رفتاریمیزین بدلین و هزینه سین اوده مه لی ییک.



گونئی آذربایجان اویرنجی حرکاتی

گله جک بیزیمدیر